Intrapriżi żgħar u ta' daqs medju (SMEs)

Iktar minn 20 miljun SME fl-UE jirrapreżentaw 99% tan-negozji, u huma fattur ewlieni fiż-żieda ta' tkabbir ekonomiku, innovazzjoni, impjiegi u integrazzjoni soċjali. Il-Kummissjoni Ewropea għandha l-għan li tippromwovi intraprenditorija b'suċċess u li ttejjeb l-ambjent tan-negozju għall-SMEs, biex tippermettilhom jilħqu l-potenzjal sħiħ tagħhom fl-ekonomija globali tal-lum.

X'tagħmel l-UE?

Il-Kummissjoni Ewropea taħdem fuq kwistjonijiet ta' politika wiesgħa li jaffettwaw l-intraprenditorija u l-SMEs madwar l-Ewropa, kif ukoll dwar il-mekkaniżmi li jagħtu appoġġ lill-SMEs (netwerks , miżuri ta' appoġġ għan-negozji). Din tieħu azzjoni favur intraprendituri eżistenti u potenzjali. Tingħata attenzjoni speċjali għal forom speċifiċi ta' intraprenditorija , bħal intraprendituri nisa, artiġjanat jew intrapriżi ta' ekonomija soċjali.

L-azzjonijiet kollha li jappoġġjaw lill-SMEs u l-intraprenditorija għandhom qafas uniku u komprensiv li huwa l-Att dwar in-Negozji ż-Żgħar għall-Ewropa (SBA), li l-Istati Membri impenjaw ruħhom li jimplimentaw flimkien mal-Kummissjoni Ewropea.

Minħabba li l-SMEs għandhom jingħataw appoġġ fuq livell lokali, l-attivitajiet tal-Kummissjoni jikkonsistu wkoll f'għajnuna lill-Istati Membri u lir-reġjuni biex jiżviluppaw politika bil-għan li jippromwovu l-intraprenditorija , itejbu s-sitwazzjoni tal-SMEs matul l-eżistenza tagħhom , u jgħinuhom biex jiksbu aċċess għal swieq ġodda . L-identifikazzjoni u l-iskambju ta' prattika tajba huma elementi ewlenin ta' din il-politika.