Proċeduri simplifikati u maġġla - Isvezja

TALBIET GĦAL ĦLAS

1. Hemm xi proċedura li tintuża speċifikament għal talbiet jew pretensjonijiet mhux kontestati?

Iva, fl-Iżvezja tista' tagħmel talba għal ħlas permezz ta' rikors ipprezentat lis-Servizz ta’ Infurzar (kronofogdemyngighet).

1.1. X'talbiet jistgħu jsiru permezz ta' din il-proċedura?

a) X'tip ta' talbiet jistgħu jiġu kkunsidrati?

Rikors ta’ talba għal ħlas jista' jintbagħat lid-debitur biex iħallas l-ammont mitlub. It-talba għall-ħlas ma tistax issir qabel ma jkun dovut id-debitu u t-talba ma tistax tkun kontestata.

b) It-talbiet jistgħu jiġu kkunsidrati biss sa ċertu ammont?

Le.

c) Il-proċedura hija obbligatorja?

Le, m'huwiex obbligatorju li tuża din il-proċedura ta' talba għal ħlas; minnflok tista' tiftaħ kawża quddiem il-qorti distrettwali (tingsrätt).

d) Il-proċedura tista' tintuża jekk il-konvenut jgħix fi Stat Membru ieħor jew f'pajjiż terz?

Il-kundizzjoni biex tintuża l-proċedura ta' talba għal ħlas hi li l-konvenut ikollu residenza fl-Iżvezja, iżda hemm ukoll proċedura speċjali fil-każ ta' konvenut li jgħix barra l-Iżvezja. Ir-Regolament ta’ Brussell I jagħmilha possibbli li teżegwixxi titolu eżekuttiv f'kull Stat Membru u Stat firmatarju tal-Konvenzjoni.

Fuq

1.2. L-awtorità responsabbli

Ir-rikors għandu jiġi ppreżentat lis-servizz ta’ infurzar (kronofogdemyndigheten) fir-reġjun fejn igħix il-konvenut. Is-servizzi ta' infurzar jinsabu f'għaxar reġjuni u jinsabu mxerrda fid-diversi kontej. Tista' tikseb katalgu ta' dawn l-awtoritajiet mill-Awtorità Fiskali Nazzjonali (Riksskatteverket ). Jista' jsir ukoll rikors lis- servizz ta' infurzar f'dak ir-reġjun fejn il-konvenut ikollu xi proprjetà, jew fejn l-eżekuzzjoni tista' ssir b'mod xieraq.

1.3. Talbiet permezz ta' formola

Ir-rikors għal obbligu ta' ħlas għandu jsir bil-miktub u jrid jiġi ffirmat. Ir-rikorrent għandu jiddikjara fir-rikors tiegħu l-pretensjonijiet tiegħu u l-bażi għall-ammont mitlub, id-data meta dan l-ammont huwa dovut, ir-rata ta' imgħax applikabbli, u l-ispejjeż li jrid jirkupra. Fir-rikors iridu jissemmew il-partijiet.

a) Bilfors trid tintuża l-formola stabbilita?

Le, iżda għal min irid, teżisti formola ta' rikors li tinkludi struzzjonijiet dwar kif għandha timtela, u li tista' tinkiseb mill-Awtorità Fiskali Nazzjonali (Riksskatteverket ).

b) Hemm bżonn li nkun rappreżentat minn avukat?

Le, m'hemmx għalfejn tkun rappreżentat minn avukat meta tagħmel talba ta’ ħlas. M'għandekx għalfejn tkun rappreżentat minn ħaddieħor, tista’ tidher għalik innifsek.

Fuq

c) F'kemm dettall irrid nidħol fir-rigward tal-bażi għat-talba tiegħi?

Trid tispjega l-bażi tat-talba.

d) Irrid nippreżenta provi bil-miktub?

M'huwiex neċessarju li jiġu ppreżentati provi bil-miktub.

1.4. Ċaħda

Ir-regola prinċipali hi li l-veraċità tat-talba ma tiġix ippruvata mat-talba. Iżda jekk ikun jidher prima facie illi t-talba tar-rikorrent tkun infondata jew mhux valida, ir-rikors jiġi ttrattat daqs li kieku ġie miċħud mill-konvenut.

Rikors jista' jiġi miċħud għal raġunijiet ta' insuffiċjenza.

1.5. Appell

Is-sistema Żvediża ma tippermettix li l-fatti tal-każ jiġu eżaminati f'dan l-istadju. Jekk it-talba tkun dubjuża, tiġi rinvjata lill-qorti biex tiġi eżaminata minnha. Ara l-mistoqsija 1.6. hawn isfel.

Dawk il-każijiet li jiġu miċħuda skond dak li ntqal taħt 1.4. jistgħu jiġu appellati.

1.6. Kontestazzjoni

Iż-żmien li fih tista' tiġi kkontestata t-talba huwa ddikjarat fis-sottomissjoni. Normalment ikun bejn ġimgħa u ġimgħatejn. Il-kontestazzjoni għandha tiġi pprezentata bil-miktub.

1.7. L-effett ta' kontestazzjoni

Jekk il-konvenut jikkontesta t-talba, ir-rikorrent jiġi notifikat minnufih dwar dan. Jekk ir-rikorrent jibqa' jinsisti dwar it-talba tiegħu, jista' jitlob li t-talba tiġi rinvjata quddiem qorti distrettwali (tingsrätt).

1.8. Il-konsegwenza jekk il-konvenut ma jikkontestax it-talba fiż-żmien stabbilit.

Jekk il-konvenut ma jikkontestax it-talba fiż-żmien stabbilit, is-servizz ta’ infurzar (kronofogdemyndigheten) tiġi mgħarraf fl-iqsar żmien possibbli dwar id-deċiżjoni li ttieħdet fir-rigward tat-talba.

a) X'inhu meħtieġ biex tingħata sentenza vinkolanti?

Deċiżjoni mis-servizz ta' infurzar (kronofogdemyndigheten) hija titolu eżekuttiv u ebda azzjoni ulterjuri m'hi meħtieġa biex tiġi eżegwita fl-Iżvezja.