Organizzazzjoni tal-Ġustizzja - Greċja

Ċart ta’ l-Organizzazzjoni  -  -  -  -  -  -  -  -  -  -  - -  -  -  -  -   (PDF File 60 KB)

Hemm żewġ livelli ta’ ġurisdizzjoni:

IL-ĠURISDIZZJONI TA’ L-EWWEL ISTANZA

Il-qrati kompetenti f’dan il-livell huma

Fuq

1. il-Qrati tal-Paċi u 
2. Il-Qorti ta’ l-Ewwel Istanza B’Membru Wieħed jew B’Diversi Membri.

IL-QRATI TAL-PAĊI

Dawn il-qrati għandhom ġurisdizzjoni :

1. fuq tilwim kollu valutabbli f’termini monetarji fejn il-valur ma jaqbiżx € 5,900,
2. fuq tilwim kollu kemm jekk b’mod ewlieni jew b’mod supplimentari li jinqala’ fuq ftehim tal-kera jekk il-kera miftiehem għal kull xahar ma jaqbiżx € 290.

Ikun li jkun il-valur ta’ l-oġġett fit-tilwima, it-tilwim li ġej jidħol fil-ġurisdizzjoni tal-Qrati tal-Paċi:

1. Qbejjel, fi kliem ieħor kera ta’ art agrikola meta l-kera huwa miftiehem bħala perċentwal tal-produzzjoni skond l-użu lokali, jekk ma ssirx dispożizzjoni xort'oħra, li għandha x'taqsam mal-kunsinna u l-użu tal-proprjetà mikrija jew ir-ritorn tagħha lil sidha għal kwalunkwe raġuni.
2. Il-ħsara lis-siġar, id-dwieli, is-siġar tal-frott, l-uċuħ, u l-pjanti b’mod ġenerali bħala riżultat ta’ mergħa illegali ta’ annimali jew b’kull mod ieħor.
3. Ir-restrizzjonijiet fuq il-proprjetà, il-ħruġ ta’ rwejjaħ, fwar, duħħan, is-sħana jew l-istorbju jew attivitajiet oħrajn simili li jiġu mill-proprjetà immobbli oħra jekk jaffettwaw b’mod sinifikanti l-użu tal-proprjetà.
4. Il-kostruzzjoni u l-manutenzjoni ta’ installazzjonijiet ma’ ġenb art immobbli fejn huwa ċert li qed isiru hemmhekk attivitajiet illegali.
5. Ir-riskju li taqa’ struttura jew xogħlijiet oħra b’theddida ta’ ħsara lil proprjetà immobbli li qegħda ma’ ġenbha.  
6. It-tħaffir tal-pedamenti ta’ ġar b’mod li dik il-proprjetà immobbli jitneħħilha l-appoġġ meħtieġ tagħha.
7. Id-dħul jew l-iżvilupp (fil-każ ta’ friegħi) ta’ għeruq jew friegħi tas-siġar minn proprjetà immobbli li tinsab ma’ ġenbha meta dawn itellfu l-użu tal-proprjetà immobbli affettwata.
8. Il-frott li jaqa’ f’proprjetà immobbli ma’ ġenbha.
9. Id-determinazzjoni tad-distanzi meħtieġa mil-liġi jew mir-regolamenti jew l-użu lokali għat-tħawwil tas-siġar jew ta’ ġonna tas-siġar tal-frott jew it-twaqqif ta’ sisien jew it-tħaffir ta’ gandotti.
10. L-ostruzzjoni ta’ l-użu mhux ristrett ta’ toroq jew mogħdijiet kif ukoll it-telf ikkawżat minn dan l-għeluq.
11. L-użu ta’ ilma ġieri jew l-ostruzzjoni ta’ l-użu tiegħu.
12. It-tilwim li jinqala’ mill-attività tal-lukandiera jew il-mistednin tagħhom kif ukoll dawk il-persuni li għandhom remissi, imħażen, depows, ajruporti lill-annimali, vetturi, karozzi, ajruplani u oġġetti relatati li l-mistednin iġibu magħhom.
13. Talbiet mill-persuni msemmijin jew iċ-ċessjonarji tagħhom kontra l-klijenti tagħhom jew iċ-ċessjonarji tagħhom.
14. Kuntratt għall-ġarr ta’ persuni b’kull mezz ta’ trasport għat-talbiet li joħorġu minnu minn vetturali, jew l-aġenti jew iċ-ċessjonarji tagħhom.
15. Talbiet ta’ unions u kooperattivi kontra l-membri tagħhom jew iċ-ċessjonarji tagħhom għall-kontribuzzjonijiet dovuti kif ukoll tilwim dwar talbiet li jkollhom il-membri kontra l-unions jew il-kooperattivi jew iċ-ċessjonarji tagħhom għall-benefiċċji finanzjarji jew oħrajn.
16. Talbiet minn avukati jew iċ-ċessjonarji tagħhom għad-drittijiet jew l-ispejjeż meta dawn id-drittijiet u l-ispejjeż huma dwar servizzi li jkunu taw fil-Qrati tal-Paċi jew fil-Qorti tal-Pulizija.
17. Id-drittijiet jew il-kumpens ta’ xhieda eżaminati f’kull qorti jew quddiem arbitru kif ukoll dak it-tilwim dwar drittijiet jew kumpens jew spejjeż ta’ interpreti, aġenti ta’ l-escrow u marixxalli (bailiffs) immaterjalment mill-mod kif jinħatru, u ċ-ċessjonarji kollha ta’ dawn il-persuni.
18. It-tilwim li jinqala’ mill-bejgħ ta’ l-annimali minħabba difetti veri jew in-nuqqas ta’ karatteristiċi miftehma.

IL-QORTI TA’ L-EWWEL ISTANZA B'MEMBRU WIEĦED

Tilwim li jista’ jitfisser f’termini monetarji huwa soġġett għal dawn il-qrati meta l-valur ta’ l-oġġett fit-tilwima jaqbeż € 5,900 imma ma jaqbiżx € 44,000. Ikun li jkun il-valur ta’ l-oġġett fit-tilwima, il-Qorti ta’ l-Ewwel Istanza B'Membru Wieħed għandha ġurisdizzjoni fuq:

Fuq

1. Tilwim bejn professjonisti jew industriji żgħar jew bejniethom jew mal-klijenti tagħhom li jinqala’ mill-provvista ta’ xogħol jew oġġetti mmanifatturati minnhom.
2. It-tilwim li jinqala’ minn ftehim kollettiv tax-xogħol jew dispożizzjonijiet b’effett simili għal dawk ta’ ftehim kollettiv bejn dawk marbutin b’dan il-ftehim jew bejn dawk il-persuni u terzi.
3. It-tilwim bejn organizzazzjonijiet tas-sigurtà soċjali u persuni assigurati magħhom jew is-suċċessuri tagħhom jew dawk il-persuni li skond il-liġi għandhom drittijiet li joħroġu mir-relazzjoni ta’ assigurazzjoni.
4. It-tilwim dwar il-ħlas, ir-remunerazzjoni u l-ispejjeż ta’ l-avukati (ħlief għal dak it-tilwim dwar id-drittijiet għas-servizzi fil-proċedimenti quddiem il-Qorti tal-Pulizija jew il-Qorti tal-Paċi), in-nutara pubbliċi, l-avukati ta’ isfel li jittrattaw fil-Qrati tal-Paċi li nħatru skond il-forma legali, dawk li jinnotifikaw il-proċess ġudizzjarju mingħajr salarju, it-tobba, id-dentisti, il-qwiebel professjonali, il-veterinarji, l-inġiniera, u l-ispiżjarja li jkollhom lawrji minn universitajiet u skejjel għoljin, l-aġenti li nħatru skond il-forma legali jew iċ-ċessjonarji ta' dawn il-persuni kollha, immaterjalment kif inhi kkaratterizzata r-relazzjoni li minnha toħroġ il-kwistjoni u immaterjalment jekk hemmx ftehim jew le fuq l-iffissar tal-livell tad-dritt jew il-mod kif għandu jitħallas.
5. It-tilwim dwar talbiet ta’ l-arbitri u l-eżekuturi testamentarji dwar proprjetajiet orizzontali jew l-amministraturi maħturin mill-awtorità ġudizzjarja, l-istralċjarji ta’ kumpaniji jew l-entitajiet legali, jew il-werrieta jew iċ-ċessjonarji tal-persuni kollha msemmijin hawnhekk għad-drittijiet u l-ispejjeż tagħhom immaterjalment jekk hemmx ftehim jew le fuq l-iffissar tad-dritt jew il-mod kif għandu jitħallas.
6. It-tilwim dwar il-perċentwal jew il-ħlas ta’ premiums ta’ assigurazzjoni.
7. It-tilwim dwar l-iffissar, it-tnaqqis jew iż-żieda fil-kontribuzzjoni taż-żewġ miżżewġin biex tkopri l-ħtiġiet tal-manteniment tal-familja dovuta bħala riżultat ta’ żwieġ, divorzju jew relazzjoni tal-familja, l-ispejjeż tat-twelid u l-manteniment ta’ omm mhux miżżewġa u l-manteniment ta’ l-omm minn sehem ta’ wirt li ngħata lit-tarbija li qed iġġorr.
8. Tilwim dwar id-drittijiet, ir-remunerazzjoni u l-ispejjeż ta’ l-esperti, l-arbitri esperti u l-assessuri immaterjalment mill-mod kif inħatru, jew iċ-ċessjonarji tagħhom.
9. It-tilwim dwar talbiet għall-kumpens f’kull forma għat-telf minn vettura awtomobilistika bejn il-benefiċjarji jew iċ-ċessjonarji tagħhom u dawk obbligati li jikkumpensaw jew iċ-ċessjonarju tagħhom kif ukoll talbiet minn kuntratt ta’ l-assigurazzjoni ta’ vettura awtomobilistika bejn il-kumpaniji ta’ l-assigurazzjoni u l-assigurat, jew iċ-ċessjonarji tagħhom.
10. It-tilwim minn sfidi għall-proprjetà jew il-pussess ta’ propjetà mobbli jew immobbli.
11. It-tilwim dwar il-manteniment u l-kustodja tat-tfal kif ukoll dak dwar id-deċiżjoni fuq fejn għandha tkun id-dar tal-familja u l-allokazzjoni ta’ proprjetà immobbli bejn il-miżżewġin fil-każ li ma jibqgħux jgħixu flimkien.
12. It-tilwim bejn il-proprjetarji ta’ sulari jew appartamenti li jirriżultaw minn relazzjonijiet ta’ proprjetà orizzontali kif ukoll tilwim bejn l-amministraturi ta’ bini li jkollhom proprjetajiet orizzontali u sidien ta’ sulari jew appartamenti.
13. It-tilwim dwar ir-revoka ta’ deċiżjonijiet ta’ laqgħat ġenerali ta’ unions jew ta’ kooperattivi.
14. It-tilwim li jinqala’ mill-kiri ta’ oġġetti jew oġġetti oħra ta’ profitt jew mill-qbejjel li ma jidħlux fil-ġurisdizzjoni tal-Qrati tal-Paċi.
15.  Tilwim li jinqala’ minn kuntratti ta’ xogħol jew kull kawża oħra dwar dan ix-xogħol, bejn l-impjegati jew ċ-ċessjonarji tagħhom jew dawk li l-liġi tagħtihom id-dritt mill-provvista tax-xogħol ta’ dawk ta’ qabel, u min iħaddem u ċ-ċessjonarji tagħhom.
16. It-tilwim li jinqala’ mill-provvista ta’ xogħol skond kuntratt jew minn kull kawża oħra dwar dak ix-xogħol bejn dawk li jaħdmu flimkien għall-istess persuna li timpjegahom.

IL-QORTI TA’ L-EWWEL ISTANZA B’DIVERSI MEMBRI

Din il-Qorti għandha ġurisdizzjoni fuq:

1. It-tilwim kollu li fuqu l-Qorti tal-Paċi jew il-Qrati ta’ l-Ewwel Istanza B’Membru Wieħed ma jkollhomx ġurisdizzjoni
2. Appelli kontra deċiżjonijiet mill-Qrati tal-Paċi fid-distrett tagħhom.

IL-QORTI TAT-TIENI ISTANZA

IL-QRATI TA’ L-APPELL

Appelli kontra d-deċiżjonijiet tal-Qrati ta’ l-Ewwel Istanza B’Membru Wieħed jew B’Diversi Membri fid-distrett tagħhom jidħlu fil-ġurisdizzjoni tal-Qrati ta’ l-Appell.

IL-QORTI SUPREMA (AREIOS PAGOS)

1. Il-Qorti Suprema għandha ġurisdizzjoni li tisma’ kawżi għall-kassazzjoni fuq kwistjonijiet biss bħal żbalji fil-liġi fid-deċiżjonijiet magħmulin minn kull qorti Ċivili.
2. Sakemm ma jkunx hemm dispożizzjoni kuntrarja petizzjonijiet għal referenza, fil-każ tat-tneħħija ta’ mħallfin minn qrati ċivili b’diversi membri jekk il-qorti li tkun għamlet id-deċiżjoni sfidata mir-rimedju ġudizzjarju ma tkunx teżistix aktar.

Ir-rimedji ġudizzjarji tal-ftuħ mill-ġdid ta' deċiżjoni ta' kontumaċja jew il-ftuħ mill-ġdid ta' deċiżjoni kkontestata jinstemgħu mill-qorti li tkun ħarġet id-deċiżjoni li tkun qed tiġi sfidata.

 

« Organizzazzjoni tal-Ġustizzja - Informazzjoni Ġenerali | Greċja - Informazzjoni Ġenerali »

Fuq

L-aħħar aġġornament: 22-11-2006